தனிநாடு குறித்து முடிவெடுக்க  கெட்டலோனியாவுக்கு  காலக்கெடு

தனிநாடு குறித்து முடிவெடுக்க கெட்டலோனியாவுக்கு காலக்கெடு

/ Thursday, 12 October 2017 10:07

ஸ்பெயினிலிருந்து பிரிவது தொடர்பாக ஐந்து நாட்களுக்குள் முடிவெடுக்குமாறு கெட்டலோனியா தலைவருக்கு ஸ்பெயின் பிரதமர் கால அவகாசம் கொடுத்துள்ளார்.

ஸ்பெயினின் பொருளாதாரத்தில் முக்கிய பங்கு வகிக்கும் மாகாணமான கெட்டலோனியா தனிநாடாகப் பிரிவது தொடர்பான வாக்கெடுப்பை கடந்த முதலாம் திகதி நடத்தியது. இந்த வாக்கெடுப்பில் பங்கேற்ற 2.3 மில்லியன் மக்களில் 90 பேர் தனிநாடாக கெட்டலோனியா பிரிவதற்கு ஆதரவு தெரிவித்தனர். இதையடுத்து தனிநாடாகப் பிரிவது உறுதி என கெட்டலோனியா தலைவர்கள் தெரிவித்தனர்.

நேற்றுமுன்தினம் கெட்டலோனியா பகுதி நாடாளுமன்றத்தில் பேசிய பியுங்டிமாண்ட், 'தனிநாடு வாக்கெடுப்பு முடிவுகளை ஏற்றுக்கொள்வதாக அறிவித்தார். இருப்பினும், தனிநாடு குறித்த அறிவிப்பை அவர் வெளியிடவில்லை. மாட்ரிட்டுடன் பேசி முடிவெடுக்கப்படும் எனவும் அவர் தெரிவித்திருந்தார்.

இந்நிலையில், தனிநாடாகப் பிரிவது குறித்து பரிசீலனை செய்து ஐந்து நாட்களுக்குள் முடிவை அறிவிக்குமாறு ஸ்பெயின் பிரதமர் மரியானோ ரஜாய் தெரிவித்துள்ளார். ஸ்பெயின் நாடாளுமன்றத்தில் பேசிய அவர், 

'நேற்றுமுன்தினம் கெட்டலோனியா சுதந்திரம் குறித்து அறிவிக்கப்பட்டதா? இல்லையா? என்பதை ஸ்பெயின் மக்களுக்கு பியுங்டிமாண்ட் தெளிவுபடுத்த வேண்டியது அவசியமானது. இது தொடர்பாக அவர் இறுதியாக யோசித்து நல்ல முடிவை எடுக்க அவருக்கு ஐந்து நாட்கள் அவகாசம் அளிக்கப்படுகிறது. எதிர்வரும் 19ஆம் திகதி காலை 10 மணிக்குள் அவர் தனது முடிவைத் தெரிவிக்கவேண்டும்" என ஸ்பெயின் பிரதமர் மரியானோ தெரிவித்துள்ளார்.

ஸ்பெயினுடன் கெட்டலோனியா இணைந்திருக்க வேண்டுமென்ற கோரிக்கையுடன் அந்நாட்டின் தலைநகரில் பேரணிகள் நடைபெற்றன. பல்லாயிரக்கணக்கான மக்கள் மாட்ரிட்டில் ஒற்றுமையை வலியுறுத்தி ஆர்ப்பாட்டத்தில் ஈடுபட்டனர். அதேநேரம், கெட்டலோனிய நகரமான பார்சிலோனாவில் இப்பிரச்சினைக்கு அரசியல் ரீதியான பேச்சுகளை வலியுறுத்தி மக்கள் போராட்டம் செய்தனர் என்பது குறிப்பிடத்தக்கது.

Please publish modules in offcanvas position.